. DAVID MARETT writes in Jèrriais on the lost farms of St Martin. Published with thanks to Les Nouvelles de St Martin parish magazine, where this article first appeared:
TCHI QU’ÉTHEU PEUT L’CRAITHE?
See below for an English translation
I’ y-à tchique années acheteu, lé Sieur Dr John Renouf du Musée et dé l’Êducâtion autefais, nouos disait dans eune lectuthe qué lé fèrmage n’avait pas changit fort pour des chentaines d’années jusquà la dreine dgèrre. Et bein seux lé travas ‘té fait auve les j’vaux à haler lé hèrnais, la tchéthue ou les hèrches. I’ faut bein dithe qué les preunmyis tracteurs apparûte dans années trente, mais bein seux la dgèrre înterrompit tout ch’na.
Si ch’est vrai chenna, létchel éthait prédit qué dans eune affaithe dé chinquante ans, toutes ches fèrmes là s’raient presqué toutes dispathus et touos les vaisîns qué j’connaisêment par nom, presqué tous hors étout! Dans nouotre carre au nord-ouest dé la pâraisse, i’ n’y a qu’ La Fèrme, un d’mié mille drièthe nous tchi reste comme fèrme anniet, auvec ses belles bêtes, qu’appartchénent à la famille Pèrchard.
Si jé c’menche à l’Arsénal, jé passons ‘Mainland’ autefais, à la Trin’té, i’ faut bein dithe. Ch’n’était pas exactement eune ferme quand j’tais mousse, mais jé crait qué lé bouon homme Joe Tchéthée, craissait accouo tchique lédgeunmes, tandis qué son vrai mêtchi ‘té tchèrpentchi et Entrépranneux. Et pis nouos v’chîn au ‘Clios Fallu’et les Mess Renouf Tom et son fréthe Emile, et pis Jack dé Gruchy pour un couplye d’années, d’vant qué la famille Richardson arrivîtes et la r’nomîte North Lynn quand I’ chittîte la sienne dans les Huriaux, tchi d’vînt ‘Hollybank’
Dé l’aut’e bord dé la route, ch’tait nous à ‘Green View Farm’ . Après ch’na, Beauvoir et Mess Hedley Renouf, suivi dé sa fille Enid et s’homme Harold de la Haye. Jé n’s’rais pas ravi qu’oulle avait ‘té eune p’tite fèrme étout mais d’vant mon temps. Ava la Ville Brée i’y avait Mess Tom Billot Connétabl’ye autefais, son grand fréthe Charles, lé Député, et entre yeux Mess Harold Renouf . Un mio pus lien, par mon temps, Mess Marcel Lé Corre, à la Hanniéthe, et pis Les Pièches et Hollybank. Les Fiefs, mon bieaux péthe sé souv’nait quoulle ‘té d’un temps eune aut’e p’tite fèrme.
Juste passé la Ville Brée, ch’tait Mess Nelson Renouf, drait comme un pitchet au Vivyi. Jé n’s’rais pas ravi si Otago avait ‘té eune p’tite fèrme étout dans lé temps à Jack Robert – tchique j’appellerêment en Angliais un ‘market garden’. Mess Menguy, à West Lea labouothait tchique clios. Ava Lé Hutchet, Mess Jack Jehan gardait la fèrme pour les maîtrêsses, les Miss Renouf, à La Franchise, et pis les Baudains au Hutchet, et Mess Jack Richard en d’sus. Mess Walton à travèrs lé clios, au Pré et Lesley Lé Seelleur et sa fanmille à la Crouaix-au-Maître et l’aut’e fèrme, tchi n’té pus d’autre, dé l’aut’e bord du Carrefour. S’en allant à l oueste ch’tait les Mess Betchet, Renouard, Le Gresley et Klein.
Et bein n’en v’là bein assez. Mais tchi changements dans un si p’tit endrait dans si p’tit temps! Vingt ou p’tèt’e vingt-chinque fèrmes et rèque ieune acheteu! Et j’pouorrais pas vouos dithe tchi qu’y d’meuthe au jour d’anniet!!
English translation:
WHO WOULD HAVE BELIEVED IT?
SOME years ago, Dr John Renouf, formerly of the Museum and Education Department, told us in a lecture that farming had hardly changed in hundreds of years until the last World War. And truly the work was done with horses pulling carts, ploughs and harrows. One must admit that tractors had begun to appear in the 1930s, but of course the war interrupted all that.
If that is correct, who would have predicted that in a mere 50 years, all those farms would have disappeared and all those neighbours we knew by name would almost all have gone too! In our corner of the parish there is only La Fèrme, half a mile behind us which remains a working farm today, with its lovely cattle, belonging to the Perchard family.
Just passed Ville Brée, it was Mr. Nelson Renouf, always straight as a die farming at Le Vivier. I would not be at all surprised if ‘Otago’, at the end of Le Huquet, had been a small farm as well in the days of Jack Robert, perhaps what would be called a ‘market-garden’ in English. Mr. Menguy, at West Lea cultivated a few fields from there. Then down Le Huquet, Mr. Jack Jehan worked the farm for the Misses Renouf who were school-teachers, at La Franchise before farming it in his own right. Then we come to the Baudains at Le Huquet and above that Mr. Jack Richard. Across the fields was Mr. Walton at Le Pré and Lesley Le Seelleur and his family at Croix au Maître, and the farm the other side of the crossroads no longer worked. Travelling west it was Messrs. Becquet, Renouard, Le Gresley and Klein.
If I start at the Arsenal, we pass the former ‘Mainland’, in Trinity it must be admitted. It was not exactly a farm when I was a child, but I think old Mr Joe Querée did grow a few vegetables, even if his proper profession was a carpenter/builder and Funeral Director. Then we come to ‘Clos Fallu’ and Messrs Renouf, Tom and his brother Emile, then Jack de Gruchy for a couple of years, before the Richardson family arrived and renamed it North Lynn.
The other side of the road it’s ‘Green View Farm’ (C) and us, the Maretts. After that, ‘Beauvoir’ and Mr. Hedly Renouf, followed by his daughter Enid and her husband, Harold. I wouldn’t be surprised that it was once a small farm as well, but before my time. Down ’Ville Brée’ there was Mr. Tom Billot, former Connétable, his older brother, Charles, the Deputy, and between them, Mr. Harold Renouf. A little further along, by my time, Mr. Marcel Le Corre at La Hanneière – a place where ‘galingale’ grows. And then Les Pièces and Hollybank ‘Les Fiefs’ – my late father-in-law remembered a time when that was a small farm.
Well that is quite enough. But what a transformation in such a small area, in such a short time! Twenty, or perhaps 25 farms, and only one left now! And I could not tell you who lives there now!
